दैनिक साढे १२ घण्टा लोडसेडिङ

विद्युत् प्राधिकरणले भोलि (सोमबार)देखि दैनिक साढे १२ घण्टा लोडसेडिङ गर्ने भएको छ । नदीहरूमा जलस्तर घटेर विद्युत् उत्पादनमा गिरावट आउँदा दैनिक ५५ लाख युनिट बिजुली अपुग भएपछि प्राधिकरणले लोडसेडिङ बढाएको हो ।
अहिले ऊर्जाको माग बढेर दैनिक १ करोड ५० लाख युनिट तथा आपूर्ति ९५ लाख युनिटमात्र भएको प्राधिकरण प्रणाली सञ्चालन विभागका प्रबन्धक भुवनकुमार क्षेत्रीले बताए । उनका अनुसार अब सातामा ८८ घण्टा लोडसेडिङ हुनेछ ।
लमहीबाट पश्चिम र पूर्वमा दैनिक ९÷९ घण्टासम्म लोडसेडिङ हुनेछ । आगामी सातादेखि मध्यमस्र्याङ्दी आयोजना मर्मतका लागि बन्द हुने भएकाले लोडसेडिङ अझ बढ्ने सम्भावना रहेको क्षेत्रीले बताए । प्राधिकरणले औद्योगिक क्षेत्रमा दैनिक १० घण्टा बिजुली आपूर्ति गर्नेछ ।
क्षेत्रीका अनुसार रामनगर–गण्डकबाट २० मेगावाट र रक्सौल–परवानीपुरबाट १० मेगावाट बिजुली ल्याउन तयारी भइरहेको छ । भारततर्फको प्रसारण–लाइन मर्मत सकिएपछि दुई नाकाबाट बिजुली आयात गर्न सकिने उनले बताए । भारतबाट ३० मेगावाट बिजुली आयात हुने आशामा मध्यमस्र्याङ्दी बन्द नगरिएको हो । यो आयोजनाबाट ३५ मेगावाट बिजुली उत्पादन भइरहेको छ ।
भारतबाट थप बिजुली आयात नगरे र अन्य वैकल्पिक उपाय अवलम्बन नभए आगामी फागुन–चैतमा दैनिक १९ घण्टासम्म लोडसेडिङ हुने प्रक्षेपण प्राधिकरणको छ । भारतबाट पनि थप बिजुली आपूर्ति गर्न समय लाग्ने र थर्मल प्लान्ट तत्काल नआउने अवस्था आएपछि देशमा ऊर्जा संकट गहिरिएको छ ।
प्राधिकरणले गरेको प्रक्षेपणअनुसार माघमा ६२ लाख ८० हजार, फागुनमा ६५ लाख ४५ हजार र चैतमा ६३ लाख ४१ हजार युनिट बिजुली अपुग हुनेछ ।
लोडसेडिङले उद्योगी सबैभन्दा मारमा परेको नेपाल उद्योग वाणिज्य महासंघका उपाध्यक्ष पशुपति मुरारका बताउँछन् । “एकातिर बिजुली छैन, अर्कातर्फ उद्योगसँग भएको जेनेरेटर चलाउन डिजेल पाइँदैन, कसरी उद्योग चलाउने हो, ठूलो समस्या छ,” उनले भने ।
मुरारकाका अनुसार कुल आपूर्तिको ३३ प्रतिशत बिजुली औद्योगिक क्षेत्रले खपत गर्छ । “अहिलेको माग हेर्दा ३ सय २५ मेगावाट बिजुली उद्योगलाई चाहिन्छ,” उनले भने ।

source

सोमबारदेखि दैनिक १४ घण्टा लोडसेडिङ

विद्युत प्राधिकरणले सोमबारदेखि लोडसेडिङ समय बढाएर दिनको १४ घण्टासम्म गर्ने भएको छ। जाडो समयसँग बिजुलीको माग ह्‍वात्तै बढेको र उत्पादन भने घटेकोले लोडसेडिङ बढाउनुपरेको प्राधिकरणले जनाएको छ।
हप्ताको तीन दिन १० घण्टा, दुई दिन १२ घण्टा र बाँकी दुई दिन १४ घण्टा लोडसेडिङ हुने तालिका प्राधिकरणले सार्वजनिक गरेको छ।

'सोमबारदेखि सातामा ८२ घण्टा घण्टा लोडसेडिङ गर्दैछौं,' प्राधिकरण प्रणाली सञ्चालन विभाग प्रमुख चिरन्जिबी शर्माले भने। बढी बिजुली चुहावट हुने स्थानहरुमा थप तीन घण्टा लोडसेडिङ हुने प्राधिकरणले जनाएको छ।
प्राधिकरणका अनुसार आइतबार, सोमबार र मंगलबार दैनिक १० घण्टा लोडसेडिङ हुनेछ। बुधबार र शनिबार १२/१२ घण्टा र विहीबार, शुक्रबार भने १४/१४ घण्टा लोडसेडिङ हुने जनाइएको छ।

अहिले सातामा ६९ घण्टा लोडसेडिङ भैरहेको छ। माघ ८ गतेदेखि प्राधिकरणले ७० मेगावाटको मध्यमर्स्याङदी जलविद्युत केन्द्र मर्मत थाल्दैछ। त्यतिखेरको लागि उपभोक्तालाई तयार पार्न प्राधिकरणले अहिलेदेखि नै लोडसेडिङ बढाएको हो। मध्यमर्स्याङदी तीन साताको लागि बन्द हुँदैछ।

source